" صلاح جاهين "
لقيت فى جيبى قلم .
قلم رصاص ، طول عقلة الصابع ،
معرفش مديت ايدى عايز ايه .. راح طالع ،
أصفر ، ضعيف ، ضايع ،
ومابين تراب دخان ، وقشر سودانى ، كان مدفون ،
وكنت ماشى لوحدى فى الشارع ،
معرفش رايح فين ، لكن ماشى ،
والليل عليا وع البلد غاشى ،
ليل ، انما ليل اسود الاخلاق .
ليل ، انما عملاق ،
اسود سواد خناق ،
اسود ، كمليون عسكرى ، بستره خفاشى ،
وجزمه ضباشى ،
بينظموا السهره .
الخلق ياحسره ،
الخلق مالهاش خلق للسهره ..
الخلق عاملين زى عشاق كلهم مهاجير ،
ومروحين مقاهير
يستنظروا بكره .
مقهور أنا وماشى
- أصل القمر قال جاى وماجاشى -
ع النيل ماجاش .. وماجاش كمان ع الهرم ..
لفيت عليه القلعه لفيت بولاق ،
قمرى لقيته عدم .
لفيت عليه امبابه والوراق ،
قمرى لقيته محاق .
وعنيا وقعوا م السما ع الارض ،
الارض برضه محاق .
قهاوى سوده ، من الهباب والهذر ،
والراديوهات تنعب نعيب الجنون .
ياليله من غير قمر ...
ياكحل من غير عيون
********
ولقيت فى جيبى قلم ،
كأنه واد مقروض ومتجادع ،
قزعه لكين ملعون ،
مبرى قوى ومسنون
تقولش ح يخطط نظام الكون ؟!
واعمل به ايه وانا ماشى فى الشارع ،
أنا كمان قزعه وكمان ضايع
وكمان عليا تلول تراب دخان .
********
ياميت ندامه عليكو ياصنايع ،
سبع صنايع ، بس آه ياندم ،
سبع صنايع ، بس آه يازمان ..
ارسم لى قطه يابابا ..
ارسم له قطه بتشتغل بهلوان
أكتب لى اسمى يابابا ..
أكتب له اسمه بخط مرعوش حنان .
ادينى قلمك يابابا ..
أديله قلمى يشخبطبه ع الحيطان .
وشيلنى أوبح يابابا ..
أشيله على صدرى كما الصولجان !
... كان القمر أيامها طفلى أنا ،
وعليه زغب ناعم كمثل الطير ،
واخضر كأنه لمونه م البنزهير ،
وكنت اشيله ، وافرجه لكل حى ،
اتفرجوا ، شوفوا غلاوة الضنا
والناس يقولوا اسم الله خير والله خير ،
يارب خليه لك ..
الرب خلاه .. بس مش ليا ،
ضاع القمر منى وانا غفلان ،
وصبحت يا أخوان ،
لابد ما يتشحتفوا عنيا
علشان أطول منه شعاع من ضى
********
وادينى ماشى لوحدى فى الشارع ..
معرفش رايح فين ، لكين ماشى ،
والليل عليا وع البلد غاشى ،
ولقيت فى جيبى قلم ..
كتبت به غنوة عذاب .
_____
ليست هناك تعليقات:
إرسال تعليق